საქართველოს შეიარაღებული ძალების 718-მა რეკრუტმა სამხედრო ფიცი მიიღო. საზეიმო ცერემონია ქუთაისში გელათის სამონასტრო კომპლექსში გაიმართა. რეკრუტები მეუფე კალისტრატემ აკურთხა, დალოცა ისინი და სამხედრო სამსახურში წარმატება უსურვა.

ჯარისკაცების ფიცის მიღების ცერემონიას საქართველოს შეიარაღებული ძალების გაერთიანებული შტაბის უფროსი, გენერალ-მაიორი დევი ჭანკოტაძე, თავდაცვის სამინისტროს და შეიარაღებული ძალების გაერთიანებული შტაბის ხელმძღვანელი პირები დაესწრნენ.

რეკრუტები დაწყებითი საბრძოლო მომზადების კურსს მესამე ქვეითი ბრიგადის ბაზაზე გადიან. 5 კვირის განმავლობაში მათ თეორიული და პრაქტიკული სწავლებები უტარდებოდათ. სამხედროებმა ჯარისკაცის ინდივიდუალური მომზადება, პირველადი სამედიცინო დახმარება და საერთო საჯარისო წესდებები გაიარეს. სწავლების მეორე ეტაპზე კი რეკრუტები ბრძოლის ველიდან დაჭრილის ევაკუაციას, საცეცხლე და ტაქტიკურ მომზადებას და კავშირგაბმულობის საფუძვლებს შეისწავლიან. დაწყებითი საბრძოლო მომზადების კურსი 20 ივნისამდე გაგრძელდება.