დღეს სამოქალაქო უსაფრთხოებისა და თავდაცვის პირველი კაბინეტი გაიხსნა. გახსნას მცხეთის მეორე საჯარო სკოლაში საქართველოს თავდაცვისა და განათლების მინისტრები დაესწრნენ. საქართველოს პრეზიდენტის ინიციატივის საფუძველზე, სამოქალაქო თავდაცვისა და უსაფრთხოების ახალი პროგრამა განათლების სამინისტრომ თავდაცვის, შინაგან საქმეთა, შრომის, ჯანმრთელობისა და სოციალური დაცვის, გარემოს დაცვისა და ბუნებრივი რესურსების სამინისტროების წარმომადგენლებთან და უცხოელ ექსპერტებთან ერთად შეიმუშავა. ახალი სასწავლო პროგრამა მოიცავს ისეთ საკითხებს, როგორიცაა სამოქალაქო თავდაცვა, საგზაო უსაფრთხოება, პირველადი სამედიცინო დახმარება, ქართული ჯარის ისტორია და ქართული არმიის შეიარაღების გაცნობა. „ეს არის ძალზედ მნიშვნელოვანი პროგრამა, რადგან ნებისმიერმა ახლაგაზრდამ უნდა იცოდეს ელემენტარული უსაფრთხოების წესები. ეს პროგრამა უპირველეს ყოვლისა გულისხმობს ამ უსაფრთხოების წესების შესწავლას. ასევე მნიშვენლოვანია ბავშვებმა იცოდნენ საგზაო უსაფრთხოების, სამედიცინო უსაფრთხოების და იარაღთან ელემენტარული მოქცევის წესები. უმნიშვნელოვანესია რომ ისინი ამავდროულად, პროგრამის ფარგლებში, ქართული არმიის ისტორიას და ქართული არმიის თანამედროვე შეიარაღებას შეისწავლიან" - განაცხადა თავდაცვის მინისტრმა ბაჩო ახალაიამ. განათლების მინისტრის თქმით - 2010 წლიდან ყველა საკოლაში დანერგილი იქნება ახალი საგანი – სამოქალაქო თავდაცვა და უსაფრთხოება - „დღეიდან 15 სკოლაში პილოტური სწავლება დაიწყება. ეს საგანი შეისწავლება სამ საფეხურად და დღეს თქვენ ესწრებით მესამე საფეხურის პრეზენტაციას, რომელსაც ჰქვია საქართველოს ჯარის შეიარაღების მიმოხილვა და საქართველოს ჯარის ისტორია. მე ძალიან დიდი მადლობა მინდა გადავუხადო თავდაცვის სამინისტროს დახმარებისათვის,” აღნიშნა განათლების მინისტრმა კაბინეტის გახსნაზე. სამოქალაქო თავდაცვისა და უსაფრთხოების სწავლების პროგრამა ამ ეტაპზე არის პილოტური და მსგავსი კაბინეტები რუსთავის, მცხეთის და თბილისის 15 სკოლაში გაიხსნება. საპილოტე სკოლები, სპეციალურად შემუშავებული მეთოდოლოგიის საფუძველზე შეირჩა. მიღებული პილოტირების შედეგების ანალიზის შედეგად, სამოქალაქო თავდაცვისა და უსაფრთხოების კურსი საბოლოო სახით ჩამოყალიბდება და ახალი სასწავლო წლიდან სკოლებში სავალდებულო საგანი გახდება. 
magaria vashaa :D
gaumarjos qartul jars