უკრაინის უშიშროების სამსახურის კონტრდაზვერვამ უკრაინის ხელისუფლების მითითებით რუსეთის სპეცსამსახურების თანამშრომელთა თვალთვალი შეწყვიტა. 

2010 წლის 19 მაისს უკრაინისა და რუსეთის უშიშროების სამსახურებმა თანამშრომლობის შესახებ შეთანხმებას მოაწერეს ხელი. შეთანხმება სევასტოპოლში რუსეთის კონტრდაზვერვის წარმომადგენელთა დაბრუნებასაც ითვალისწინებს. 

მათ სევასტოპოლი იუშჩენკოს პრეზიდენტობის დროს უკრაინის უშიშროების სამსახურის მოთხოვნით 2009 წლის დეკემბერში დატოვეს. მაშინ გადაწყვიტეს, რომ რუსეთის კონტრდაზვერვის თანამშრომლებს უკრაინაში არაფერი ესაქმებოდათ და რუსეთის შავი ზღვის ფლოტის უსაფრთხოებაზე პასუხისმგებლობას მათი უკრაინელი კოლეგები საკუთარ თავზე აიღებდნენ. 

გარდა ამისა, "Зеркала недели"-ის ინფორმაციით, უკრაინის უშიშროების სამსახურმა უსახსრობის გამო, არალეგალური აგენტების მომზადების პროგრამა შეწყვიტა.