ავღანეთში სამშვიდობო მისიით მყოფი ქართველი სამხედროები საქართველოს პარლამენტის თავმჯდომარემ დავით ბაქრაძემ მოინახულა. მან დეპუტატებთან ერთად ის სამხედრო ბაზა დაათვალიერა, სადაც ქართული ასეული ფრანგული კონტინგენტის შემადგენლობაში მსახურობს. ქართველი კანონმდებლების დელეგაცია (დეპუტატები: გიორგი თარგამაძე, პეტრე ცისკარიშვილი, სოსო ქუთათელაძე, გია თორთლაძე) დეტალურად გაეცნო სამხედროების საქმიანობას, მათ საცხოვრებელ პირობებს და ბაზაზე ქართველი ჯარისკაცების მიერ აშენებული ტაძარი მოინახულა.
„როდესაც ჩვენ დავინახეთ ქართველი ჯარისკაცები და მათ მხარზე ქართული დროშა, პირველი შეგრძნება იყო ძალიან დიდი სიამაყე, ვინაიდან ესენი არიან ღირსეული, ღირსეულად მომზადებული და ღირსეულად გაწვრთნილი ვაჟკაცი სამხედროები," აღნიშნა პარლამენტის თავმჯდომარემ ჟურნალისტებთან საუბრისას.
23–ე ბატალიონის ასეული ქაბულში 2009 წლის ნოემბრიდან იმყოფება. ქართული დანაყოფი ფრანგულ ბაზაზე დისლოცირებული ნატოს წევრი და პარტნიორი 15 ქვეყნის სამხედროების უსაფრთხოებას უზრუნველყოფს. „ჩვენი სამხედროები საკუთარ მოვალეობას წარმატებით ასრულებენ," განაცხადა კაპიტანმა ანტონ ქუთათელაძემ.
ვიზიტის ფარგლებში, ქაბულში ფრანგული ბაზის მონახულების შემდეგ, დავით ბაქრაძე ქართულ დელეგაციასთან ერთად ავღანელ კოლეგას მუჰამედ იუნის ქანუნის შეხვდა. მოგვიანებით კი ავღანეთში ISAF-ის (საერთაშორისო უსაფრთხოების ძალები) შტაბბინას ესტუმრა, სადაც ნატოს სამხედრო მაღალჩინოსნებთან ISAF-ის ოპერაციის დეტალები განიხილა.